థామస్ కుక్..కోలాప్స్: రోడ్డున పడ్డ 22వేల మంది
Sep 23 2019
ప్రపంచవ్యాప్త మాంద్యం యూరప్ నుంచి బ్రిటన్ వైదొలిగే బ్రెగ్జిట్ దెబ్బకు ప్రపంచ ప్రఖ్యాత పర్యాటక విమానయాన సంస్థ ‘థామస్ కుక్’ కుదేలైంది. తీవ్ర నష్టాలతో కుప్పకూలింది. ఎంతో ఫేమస్ అయిన ఈ సంస్థ పెట్టుబడుల కోసం అన్వేషించి ఎవరూ రాకపోవడంతో దివాళా తీసినట్టు థామస్ కుక్ సీఈవో పీటర్ ఫాంక్ హౌజర్ ఆదివారం రాత్రి ప్రకటించారు. బ్రెగ్జిట్ సంక్షోభంతో పర్యాటకం పడిపోయి తమ సంస్థ నష్టాల్లోకి కూరుకుపోయిందని థామస్ కుక్ ఎయిర్ వేస్ ప్రకటించింది.
థామస్ కుక్ సంస్థ దివాళా తీయడంతో పాటు ఇదివరకే ఈ సంస్థలో ప్రయాణికులు బుక్ చేసుకున్న దాదాపు 6 లక్షల విమాన టికెట్లను వెంటనే రద్దు చేసింది. వారంతా ఇప్పుడు ఆయా దేశాల్లోనే చిక్కుకుపోయారు. ఇక థామస్ కుక్ చెందిన వివిధ దేశాల్లోనే 22 వేల మంది ఉద్యోగులు రోడ్డున పడ్డారు. ఇందులో 9వేల మంది బ్రిటన్ వారు ఉండడం గమనార్హం.
థామస్ కుక్ దివాళా.. విమానయాన టికెట్ల రద్దుతో వివిధ దేశాల్లో చిక్కుకుపోయిన బ్రిటన్ వాసులను దాదాపు 40కు పైగా చార్టెడ్ విమానాలు మిగతా విమానాలను అద్దెకు తీసుకొని వారిని ఉచితంగా బ్రిటన్ కు తీసుకువచ్చేందుకు ప్రయత్నిస్తున్నామని బ్రిటన్ రవాణా కార్యదర్శి గ్రాంట్ షాప్స్ చెప్పారు.
ప్రపంచంలోనే ప్రసిద్ధమైన బ్రాండ్లలో ‘థామస్ కుక్’ చాలా ఫేమస్. దీన్ని 1841లో ఇంగ్లండ్ లోని లీసెస్టర్స్ షైర్ లో థామస్ కుక్ అనే వ్యక్తి స్థాపించాడు. మొదట రైలు సేవలను ప్రారంభించిన సంస్త ఆ తర్వాత విమానయాన రంగంలోకి దిగింది. 16 దేశాలకు విస్తరించి ప్రపంచంలోనే ప్రముఖ బ్రాండ్ గా నిలిచింది. 178 ఏళ్ల చరిత్ర కలిగిన ఈ పర్యాటక సంస్థ నష్టాల నుంచి గట్టెక్కాలంటే దాదాపు 200 మిలియన్ పౌండ్లు అవసరం అట.. సో సంక్షోభం ఇప్పట్లో తీరేమార్గం లేకపోవడంతో దివాళా తీసినట్టు ప్రకటించింది.
ఈ సంస్థ దివాళా కారణంగా దాదాపు 150000 వేల మంది ప్రయాణికులు ఇప్పుడు వివిధ దేశాల్లో టికెట్లు కొని చిక్కుబడిపోయారు. బుక్ చేసుకున్న 6 లక్షల టికెట్లను ప్రయాణికులు నష్టపోయారు. 22 వేల మంది ఉద్యోగులు రోడ్డునపడ్డారు. ప్రపంచంలో మాంద్యం ఎఫెక్ట్ తో భారీగా నష్టపోయిన సంస్థగా థామస్ కుక్ ప్రస్తుతం నిలిచింది.